Pengaya kitai Iban

Nama tanggung pengawa sastera tauka main asal ngena jaku kitai Iban dalam pengidup kitai kemaya haritu? Nemu kita? Ni penyampau iya? Mayuh; bisi ga positif enggau lalu bisi mega negatif.

Kitai mesti nemu iya nya sastera kitai bansa bejaku nyengkaum dalam semua pengawa: senentang lelaki enggau indu, anembiak enggau orang tuai, kitai bumai enggau pemesai, orang ke kereja enggau sekeda kompeni, kaya enggau miskin, penyayau enggau pemenchi, jadi enggau sarak, perang enggau bebaik, bepechah enggau beserakup, enggau mayuh agi.

Kitai mega nemu sastera mai mayuh macham mesej. Taja pia, sastera nya meh pengidup ke enda ulih diseliah, nama agi dibuai.

Sastetra kitai Iban? Kitai antara etnik di dunya tu ke mayuh macham adat enggau main asal. Kitai Iban kaya sastera. Sastera nya siti asil pengelandik kitai bansa ngena leka jaku ke nyadika pekara ke deka dipadahka. Sastera nya siti pekara pasal adat enggau main asal, ulah, runding sereta penemu enggau pendiau kitai.

Taja pia, gaya sastera ulih berubah nitihka jalai rebak enggau jeman pendiau mensia. Tang meh pengerembai sastera dikuasa mayuh macham pekara, baka pengerembai sosio-ekonomi, sosiopolitik enggau pemaju bansa kitai di dunya tu.

Sastera enggau leka main asal kitai Iban tumbuh maya sigi udah bisi tusun dalam jaku Iban, iya nya jaku asal bansa ke pemadu besai sereta ngerembai di Sarawak. Jaku Iban tu sama nyumbuk serentak enggau pendiau Dayak Iban di Indonesia. Jaku kitai Iban udah bisi di dunya tu kenyau ari urung 2500 ngagai 5000 taun dulu kelia.

Nitihka penemu Professor Derek Freeman, sastera kitai Iban kaya agi ari sastera Greek (Yunani) maya jeman Homer. Jaku Freeman tu udah nyadi bukti ke nyata maya mayuh macham gaya sastera bejaku Iban ditemu ari turun menurun dataika seharitu. Bisika kitai nguji nengkebang sastera dalam pengidup kitai seharitu?

Kita nemu, sastera Iban udar beurat ari mayuh macham penemu baka puisi – dalam main asal Iban baka jaku begeliga, jaku ansah, biau, pantun, sanggai, dungai, jawing sereta mayuh main benyawa baka pengap, renung, sugi, timang jalung, pelian enggau ensera, baka reti mitos, legenda, cherita ngerindang ati, ngasuh ketawa enggau ensera pasal jelu ke dikena ambika lalau enggau ajar pendiau kitai di dunya tu. Agi kelia, sastera kitai Iban nyadi ka pengidup ke bepanggalka adat. Ke nyadika penti pemali sebedau ngereja sekeda pengawa.

Kitai Iban kelalu kaya enggau main asal benyawa. Tu sebaka enggau lagu puisi ke udah didinga kitai ba radio tauka maya hari gawai datai. Tauka dilaguka sida tuai maya bisi pengerami. Bala pemacha tentu kala ninga main asal benyawa baka renung, timang jalung, pelian, sabak, jawang, ganu, sugi, pengap, dungai, pantun, sanggai, jara enggau ramban sereta main benyawa bukai mega.

Lalu mayuh macham agi penemu enggau main asal rayat kitai Iban ke makin ditinggalka. Sida tu nyengkaum penemu baka tusut, sampi, biau, jaku ansah, jaku tuai, jaku muka kujuk enggau begeliga. Lalu kitai mega bisi entelah ke endang chukup manah didinga kena ngelalai reti utai besilup.

Kita nemu, maya Raja Brooke merintah menua Sarawak, sastera kitai Iban udah ditulis sereta dipansik enggau chukup penalam. Sastera kitai udah ngerembai ke menua tasik lalu bulih puji ke chukup tinggi.

Sida ke udah ngaga pansik tu iya nya, A.W. Stonton, W. Howell, J. Derek Freeman – penulis Anya Kedap kala begulai enggau Freeman di Pulau Pinang dalam taun 1975 – Carol Rubenstein, Baughman, Erik Jensen enggau mayuh agi. Lalu mayuh bup tulis sida tu tau dipeda ba Mijum Sarawak.

Mega,sekeda bup sembiyang Kristian ditemu nulis sastera kitai Iban, baka Jalai Pengidup 1, Penyanggup Lama enggau Jalai Pengidup II. Siku orang putih AW Stonton mega udah ngaga jerita pandak Ensera Manang Gagak.

Jaku kitai Iban ngerembai mimit udah menua kitai merdeka. Pengerembai sastera kitai Iban ulih dibagi dua: ari taun 1963-1977, ke disebut rambau Biro Sastera Borneo lalu ari taun 1977 sampaika seharitu, disebut rambau Dewan Bahasa enggau Pustaka.

Maya tu meh jaku Iban bisi dipelajarka dalam sekeda sekula ke mayuh anembiak kitai Iban. Jaku Iban deka nyadi pelansar ngambika anembiak bansa kitai ngelala jaku Iban sereta adat main asal kitai Iban.

“Utai ke nyadika penyerekang, bisika anembiak kemaya haritu nemu reti sastera aki ini kitai? Ni pemayuh anembiak kitai bansa ke nemu pesaka peturun aki-ini kitai ke besangkut paut enggau sastera kitai Iban?” kenu ku siku professor ari Unimas ke enggai nama iya disebut ditu lebuh bejuraika pekara tu enggau siku ari penulis.

Mega, bisika bansa kitai Iban di dunya Sarawak agi kiruh enggau sekeda sastera kitai bansa? Dini kitai nyimpan sastera kitai Iban dalam pengidup kitai seharitu?

Pengidup kitai balat bendar bekaul enggau adat kitai. Ukai enda diasai, sastera kitai pengidup kitai. Taja pia, semina kitai enggai kiruh lalu enggai beduli ketegal kitai enda ngaku diri kitai bansa ke tulin laban ke dikungkung adat basa kitai. Kitai ngasaika diri nyelai ngembuan bemacham chara deka bejalaika sekeda adat. Kitai ngasaika diri ditanchang lalu malu ngembuan sastera ke nyelai ari bansa bukai. Kitai enggai ngaku.

Salah sapa? Engka salah bansa kitai empu? Salah aki-ini sereta apai indai kitai empun laban ke mutuska diri ari pengidup peturun bansa kitai. Angka salah rayat ke enda seati udah bisi ngembuan agama? Angka salah bansa kitai laban ke udah bepolitik lalu enda ngelala pendai penatai diri empu? Salah sapa ke bendar?

Sapa ke ulih ngetanka sastera kitai ke lain sereta nyelai tu. Sapa ke deka ngetanka sastera kitai ke chukup tebilang tu. Sastera kitai deka punas enti enda terus dikemeranka.

Lalu pia mega bansa kitai ke tulin mega tau nyadi punas enda temu tunga dudi ila enti nembiak rebak baru diatu majak ngejang diri ari penemu asal bansa diri. Tanya kitai empu sekalika temegah ati ngembuan main asal ke jauh kaya ari mayuh bansa bukai di dunya tu.

Kawin, adat ngau pengarap.

Umur aku udah manggai 24 taun, pengelama aku ke udah mereti pasal pengawa kawin melaki bini, penyuah aku udah enggau orang rami serta meda orang kawin, ka sekali aja aku udah meda kitai bansa kawin ngena serta nitih ke adat kitai iban ke bendar. Maia kawin anak indu Datuk Seri Celestine Ujang ngau anak lelaki Datuk Sulang.

Kawin ngena adat kitai iban ko aku tu, ukai bangkut-bangkut semina ke ngena ngepan iban, tang nitih semua tusun adat kawin kitai bansa ari pun sampai ke ujung, bepun ari ngambi indu, betimbal penemu, bebiau, berisan serta mayuh agi pengawa ke bukai.

Nama kebuah kitai iban ke diatu kelalu melakang ke adat asal? Engka laban tuntut pengarap kitai mesti kawin ba gereja? Ketegal bisi sekeda adat kitai iban tu betentang ngau pengarap kitai? Tauka sigi kitai bansa enggai ngereja pengawa tu nitih ke adat serta cara kitai bansa ke bendar?

Mayuh orang saru entang adat enggau pengarap. Ari nya aku deka bekunsi ke mimit penemu aku entang 2 pengawa ti enda sama tu. Ngambi ke banding, miring nya pengarap iban, alai kitai kristian enda tau ngereja ia laban pengawa nya betentang enggau jalai pengarap kitai.

Bebiau tauka sampi tu tau nyadi kedua-dua, iya nya adat, iya nya pengarap gak. Iya nya adat enti kitai bebiau tauka besampi enda ngena piring, enti ngena piting, nya pengarap. Nyadi utai tu sigi tau dikereja, tang ngena jalai kitai ke kristian.

Pulai ngagai pengawa ke melah pinang nitih ke jalai iban tu tadi, nya enda salah.

Semua tu enti dipeda dua tiga kali, ke bendar ia enda lebih ari alasan kitai bansa ka nyeliah ke adat diri. Enti ketegal pengarap kitai ti nuntut kawin ba gereja, nama kebuah maia ke dinner kawin ba hotel, kitai bansa enggai enda berasuk ke kot, ke neck tie, gown semua indah? Lebih-lebih agi, jaku ke dikena maia pengerami nya tadi nyau jaku bansa bukai.

Ngambi ke cunto, berapa iku orang bansa ribai ke bisi enggau pengawa kawin kitai bansa alai kitai enggai enda ngena jaku ribai? Nama kebuah enggai enda ngena jaku melayu? Kawin melayu, nadai meh sida ngira bansa bukai ke enggau, jaku melayu meh sida. Kawin bansa cina, jaku cina gak sida, bala sekeda ke enda nemu reti te betelengap meh dia, orang ketawa, ketawa gak sida, orang betempik jari, nitih gak.

Nama kebuah enda kitai bansa? Laban tu meh salah sigi cara kitai ngangkat ke jaku serta adat bansa kitai iban.

Kitai iban ke diatu udah Kristian, tuntut pengarap mesti dititih. Tang kitai enda tau muai serta melakang ke adat ti dipeturun ke aki ini kitai kelia. Kawin ba gereja, berami ngena cara iban. Utai ke enda tau dalam pengarap tau dikelaung, baka miring semua indah, enda perlu utai nya. Tang pengawa baka ngambi indu, betimbal penemu, betusut, berisan, bebiau nya enda salah, seagi-agi utai nya enda ngelanggar tuntut pengarap kitai.

Enda pan kitai ulih nitih ke adat ari pun ngagai ujung, tang enda salah enti kitai nyelit ke pengawa ke sekeda dalam pengerami (ba hotel), ngambi ke adat kitai ditemu orang, ngambi ke adat kitai enda lenyau sereta puntan.

Enti enda kitai bansa, sapa agi ka ngangkat ke bansa kitai?