Enti pasar Kuching enda ibuh dibanding,
laban chukup terang pandang jelas lampu kuning,
Enti sema hari lemai padam nyang panas manding,
dia kitai sama rindu sereta ransing,
mai diri sebilik ngerindang ati,
ngagai tebing ai Kuching,
ngiga penyamai pun pengelantang.
Enti menua miri enda ibuh ditusi,
endang tampak terbilang lanji-lanji,
alai temuai datai serata nengeri,
ninting bulan lebuh peremisi,
meda pengerami pengerinchah menua.
Menua Sri Aman sigi melan-melan,
alai benak mangka tiap ari ninting bulan,
keba tiap taun datai bulan chukup uan,
diatur Pesta Benak alun lelengai,
kena nyambut temuai datai ari rintis ai ngelan,
betabi jari bejabat tangan,
nanda ke basa kitai Iban,
nyambut bala temuai datai.
Lebuh maya pengawa bakanya,
lalu tepantai main Iban,
pekit keling pekit kumang,
bemain ka engkerunung betebah ka tawak,
bebukat ke silat penchak kuntau
pekit ngajat pekit bebiau asal Iban
kena merantingka suling dabung geman
kena ngetanka adat Iban
ngambi enda puntan lalu lelang.
Dikarang: Allen Charlie
