Sapa Nguai ke sapa? Hmmm.....berunding..
Aku dalam post post ke udah semampai ngemeran ke pementing kitai ke rebak ngambi ke enda ngelaung tauka melakang ke penemu serta adat asal kitai bansa. Taja pia, enti dikira tauka dirunding ke baru, dua tiga kali, bisi sekeda adat kitai tu tadi enda tentu setimpal enggau pemansang dunya alai kitai selalu nyeliah serta ngelaung ke ia.
Kemari kitai udah bekenang ke pasal kawin, adat ngau pengarap; saritu aku ka mai bala kitai bekenang ke utai ti enda kurang nyadi dalam pengidup kitai bansa ti baru ka ngidup ke diri, kawin jadi melaki-bini. Utai tu tau dikumbai adat kitai bansa ti dipeturun ari kelia-menya sampai ke diatu ari aki-ini kitai, utai tu semampai idup, pengaruh ia besai. Utai tu dikumbai kitai bansa “Nguai”.
Iban chukup bepegai ngagai adat asal bansa Iban, ambih nadai, bepegai ba adapt “Nguai” tu tadi. Nguai tu tadi selalu angkat maia ke bejadi ke pengawa jadi melaki-bini. “Sapa nguai ke sapa” nentu ke sapa nitih ke sapa. Pengawa ke betusut “sapa nguai ke sapa” tu chukup besai pengaruh dalam bansa kitai, ngejung ke enti nadai jaku pemutus ari sepiak ti ngemendar ke siku nguai, tauka sama-sama enggai nguai, tau enda nyadi pengawa ke melah pinang. Ari nya kitai nemu, berapa besai kuasa “nguai” tu tadi dalam nentu ke idup kitai iban, kelia menya lalu bisi sekeda sampai ke diatu.
Enti diperati ke bebendar, pengawa ke nguai ke pangan diri tu sigi bisi reti dalam pengidup orang kelia. Kebuah ia, laban menua jauh, nadai jalai ke manah etc. Enti siku, ngambi ke banding indu udah nguai ke laki ia, ia lalu deka nitih ke laki ia pulai ngagai menua laki ia. Jeman, enti bisi nemuai ngagai menua asal, selalu agi ke lalu nadai. Dalam konsep nguai tu tadi, enti laki nguai ke bini ia, laki tu tadi lalu nadai “hak” agi dalam semua reta-tengkira ti dipeturun ari aki-ini ngagai apai-indai serta penudi ngagai bala menyadi ia, laban ia ke udah nguai, tau dikumbai udah diempu orang bukai.
Dalam dunya ke baru tu, pengawa ke “nguai ke pangan diri” tu enda entu sesuai agi ngau pengidup kitia dalam dunya moden. Sigi kebuah ti tampak, keterubah ia laban menua udah mayuh datai jalai, pagi tu a menua laki, lemai lagi tau ba menua bini. Kedua, pengawa ke nguai kelia, nang sigi selalu ia indu nguai ke laki, sekada laki ke bisi nguai ke indu laban ke dipinta, ngambi ke banding, enti indu tu anak tunggal. Dalam dunya ke baru tu, indu ke diatu enda baka indu ke kelia, indu kelia selalu ia enda besekula tinggi, kerja ia berapi, ngintu laki serta ngibun anak. Tang ke diatu, sida ke indu udah “bediri sama tinggi” enggau kitai ke laki, nyadi pengawa nguai tu enda entu ulih dipejalai ke agi.
Penemu baru “tengah ari” ke diatu sigi chukup manah dipeda aku. Tengah ari tu reti ia enda nguai ke sapa-sapa, sepiak tulung sepiak gusung. Aku nyebut penemu tu manah laban kitai anak sigi enda tau melakang ke orang tuai, nadai cara kitai ulih malas jasa serta budi apai-indai ti udah ngada ke kitai ke dunya, ngemesai kitai nyadi orang ke menyana.
Tang anang enda ingat menyadi, taja pan diatu indu nyau enda baka kelia, enda agi nguai serta nitih ke laki, tanggungjawab indu tu tadi mesti dititih. Tajapan sekeda indu, enti ari segi pelajar tauka penemu tinggi serta lebih agi ari laki sida, enti seduai udah jadi, indu mesti bebasa ke laki sida. Salah munyi jaku, indu sigi enda tau tinggi ari laki. Pengarap kitai Kristian dalam bup Genesis udah terang madah ke Petara nempa Adam dulu, meda Adam ke sunyi diau kediri, Ia nempa Hawa, ari tulang rusuk Adam.
Nguai tu reti ia ngeleka ke apai-indai ketegal ke ka jadi enggau orang bukai, nya ke salah dipeda aku. Aku minta ampun enti penemu aku enda betul dipeda bala kita, tang, nya meh penemu aku, enti enda betul, minta bala kitai bejurai ke ia dalam ruai Facebook Iban kitai. Terima kasih.
