Pages

Friday, August 21, 2009

Asal Kitai Iban Nemu Nyabung


Nyabong manok tu endang siti ari uti asal bansa iban. Uti bansa tu bentaruh ka nyawa manok ti disabong. Ari ka bebuti nyabong ngelaban pangan diri nya tadi, penemu sabong kitai Iban pan ngerembai sereta mansang ari serak siti ngagai serak siti. Balai nyabong tu lalu nyadi ka endor kitai Iban nguji ka penalam penemu siko-siko anak Iban ba pasal bulu enggau tuah manok. Bulu enggau tuah manok tu tau dibacha ari satiap endor ba tuboh manok nya empu – ari pala nyentok ka ujong kaki, ari patok nyentok ka ujong langgai. Laban bulu manok bisi bendar besangkut paut enggau chura utai ti idup dalam dunya nyata tu, anak Iban lalu barengkah merati sereta belajar ka jalai enggau tusun pendiau utai ti idup nya tadi. Ari nya tadi, maioh bendar penemu tau ditimba nyadi ka chuan jalai pengidup anak Iban. Ari penemu nya tadi, sida nemu bebasa ka semua utai ke idup ngelingi pendiau sida lalu enda sapeneka ati masau tauka ngayah utai idup nya tadi. Bedudok ari nya tadi, kitai iban lalu niri ka balai nyabong, endor kitai begempuru bejurai ka maioh macham pekara ngena penemu ti udah ditimba. Pengawa nyabong tu tadi lalu nyadi siti ari main asal bansa Iban endor kitai nentu ka pemetul penemu ti udah ditimba siko-siko anak sabong. Enti main asal tu diketu ka, maioh penemu asal tauka penemu lama kitai Iban tau lenyau ngapa, lalu bansa kitai tau nadai dikelala orang agi laban main asal kitai udah pupus.

Nyadi keterubah iya orang bebuti belaban nyabong manok nya Raja Machan ngelaban Ambong Mungan. Nyadi Ambong Mungan tu alah sabong laban Raja Macham. Malu alah nyabong, nya alai Ambong Mungan belelang ngiga manok sabong ngagai sida Keling di Panggau Libau. Bulu manok ke deka digiga iya nya tuntong lang ngindang terbai, biring belangking pipit kechuai. Datai iya di Panggau Libau, dia Keling madah ka diri nadai ngidup ka manok ngemanah nya bulu. Iya lalu ngasoh Ambong Mungan ngiga ngagai rumah sida Sengalang Burong, laban sida din suah didinga bisi nupi manok manah bulu.

Ninga ajar Keling, Ambong Mungan lalu mupok ngagai rumah sida Sengalang Burong. Datai iya ba Aki Lang, iya lalu nusoi penemuai diri ngagai sida iya. Aki Lang lalu madah ka diri nadai nupi manok ngemanah nya bulu. Iya lalu ngajar Ambong Mungan ngiga manok ngagai Petara ka langit.

Udah tembu berandau enggau Sengalang Burong, Ambong Mungan pan lalu mupok. Nyau ka lama iya udah bejalai, iya pan datai ba Lembang Palang Subang, Nyeliah ka karang miga segala, datai di tuchong bukit sigi besenggal tinggi, nyagu ka lengi moa benda, endor rumah Raja Petara. Datai iya di rumah, iya lalu nusoi penemuai diri ke ngiga manok bulu tuntong lang ngindang terbai, biring belangking pipit kechuai.

Raja Petara madah ka diri bisi nupi manok bulu nya. Tang leboh nya manok nya udah bejalai jauh ngair ka langit. Udah iya ninga penemuai Ambong Mungan, Raja Petara lalu ngambi umpan kena iya ngumbai manok nya pulai kia. Enda bangat lama udah iya ngumbai, manok nya pan datai beteratak inggar bendar. Bulu manok nya ngenjing perenching peda Ambong Mungan. Udah manok nya ditangkap, Petara madah ka manok nya enda tau alah disabong. Ninga jako Petara munyi nya, Ambong Mungan gaga bendar ati, laban manok ke diambi iya nya enda tau alah disabong.

Udah nya Ambong Mungan mulai ka diri. Datai iya di rumah, iya ninga Kendawa pen udah ga nyau ngiga manok sabong ka menoa sebayan, nepat Ensing Jara. Nyadi bulu manok giga Kendawa nya biring gerunggang. Ambong Mungan lalu nyabong baru ngelaban Raja Machan. Raja Machan pan alah nyabong ngelaban iya, laban manok ke disabong iya nya endang disumpah Petara enda tau alah.

Nyadi Ensing Jara ke ditepat ka Kendawa ngiga manok di Sebayan nya Antu Anda Penyabong ke ngemata ka samengat manok ke mati disabong kitai di menua tu

RUKUN SABONG

1. Mimpi rurus – Manah

2. Burong rurus – Manah

3. Bulu manok maioh bunoh – Ngeraup – Siti Bulu

4. Manok manah bintih – Kering sereta Silat

5. Tisik ngemudi ka bulu manok ti manah – Tuah

6. Ngangkat ka manok ngena hari – enggau atur

7. Saa manok enggau chukup – manah intu

8. Taji ka bulih – tajam

Lapan iti Rukun Sabong ti diterang ka datas nya, rukun sabong menang, enda bertuakal agi, tentu menang. Nya baru tau berani masang manok naka pemisi, tau dipasang nerima pasang besai.

Enti kita nyabong enda ngena rukun sabong datas nya, kita semina nyabong enggau buta-tuli, sapeneka ati aja, nyabong betuakal, nyabong nasit, nyabong ngapa, nyabong nadai penemu, nyabong nadai pelajar. Tampak bendar kitai enda nemu nyabong dipeda orang ti bisi ngembuan pelajar nyabong.

Enti udah belajar sereta nemu rukun sabong, nya baru tau nyatup orang nyabong sabarang maia lalu manok ke dibai kita ka gelanggang endang disadang menang. Baka kitai ka ngerja pengawa bukai, kitai mesti bisi petua, isharat enggau rukun awak ka pengawa kitai lurus pejalai. Nadai semua utai nyamai sereta mudah diulih kitai enti enda enggau petua, isharat enggau rukun. Kitai enda tau ngutuk diri empu enti alah kategal salah petua, isharat tauka rukun, laban penyalah nya endang penyalah kitai empu ti enda chukup pelajar tauka penyabar dalam pengawa nyabong.

Besabong ka manok tu baka pengawa kitai mensia ka bentaruh ka nyawa bebuti enggau pangan diri. Sapa alah, nya mati. Nya kabuah kitai enda tau enda betati ka tiap-tiap rukun sabong, enggai ka alah uti enggau pangan diri. Kelia, enti alah uti enggau pangan diri, ngagai ringka ga pemulai sida. Nya alai rukun sabong enda tau enda dipelajar awak ka enda lebu bebuti enggau pangan diri.

By: Gregory Nyanggau
Taken from a book Iban Adat & Augury by Benedict Sandin & Prof. Clifford Sather

Jerita Bansa Iban Nemu Berumah Panjai


Ba rambau kitai Iban ke betuai ka Bejie Nangga Ari Patah Titi Jamban Penjuang kelia, kitai endang sigi nadai pendiau enggau pengarap ke tetap di pegai. Sida Bejie agi diau dalam babas serta enggau lubang gua ti bisi sabelah menoa nya. Batang pengidup enggau pendiau sida iya bepanggai ba pengawa begiga ka pemakai sabelah babas, dalam kampong puang enggau sabelah sungai ti bisi basemak menoa ke endor sida iya diau. Sida nadai ngerja pengawa betanam betupi serta nadai pendiau ti tetap baka pengidup ti dikemeran ka kitai kemaia hari tu.

Nyadi bansa bukai ke diau di ili menoa sida Bejie tu, endang lebih mansang agi ari bansa kitai. Kabuah pia, laban sida iya bisi agi pelajar enggau penemu kena nusun pendiau diri. Penemu tu dibai bansa bukai ke bisi nampil pendiau sida, baka bansa Arab, Minangkabau, Sumatra enggau bansa Jawa. Pendiau sida tu tetap agi laban sida ngemeran ka pengawa betanam betupi enggau pengawa bedagang, belayar sabelah pulau Borneo, Jawa, Sumatra enggau tanah besai Malaya. Sida mega balat bendar ngarembai ka pengarap sida sabelah rantau tu, lebih agi orang ke megai pengarap Islam. Kebuah sida iya baka nya, laban sida deka ngerembai ka kuasa perintah sida ngagai bansa orang bukai, nyengkaum bansa Dayak ke diau dalam pulau Borneo tu. Ari nya tadi sida tau bekuasa megai menoa enggau pengeraja menoa tu. Lalu pengawa baka tu endang dipupuk sida ari serak siti ngagai serak siti, sampai ka kemaia hari tu. Pengarap bukai, baka pengarap Hindu enggau pengarap Buddha ke dulu betapak di rantau tu kelia pan barengkah bapechah ngagai sabelah tisau menoa nyengkaum pulau Borneo enggau pulau Bali. Bala kerabat Raja ke enggai masok ugama baru nya lalu pindah ngagai menoa bukai, baka sida Raja Durong enggau Orang Panggau-Gelong. Sida lalu mai pengarap enggau penemu sida ngagai bansa kitai Iban. Nya kabuah dalam pengawa gawai, leka jako, atur pendiau enggau pangkat kitai Iban (e.g. Pateh, Temenggong, Penghulu, etc) bisi sabaka enggau orang ke megai pengarap Hindu tauka sabaka enggau leka jako serta pangkat ti dikena bansa Minangkabau. Pengawa gawai ke endang sabaka enggau sida tu iya nya pengawa miring enggau pengawa niri ka tiang chandi tauka kalingkang leboh kitai ngerja pengawa gawai burong.

Leboh tuai kitai Bejie enggau tuai-tuai bukai baum deka ngaga tangga dikena niki ka langit dikena batemu enggau petara ke nguasa ugama Islam, dia Bejie ngasoh menyadi iya benama Bada nyadi ka tuai nyaga serta ngiring bansa kitai Iban. Bada lalu nyadi ka tuai ngulu ka bala iya ngemeran ka pengawa ngasu, berikan enggau begiga ka utai bukai dikena ngidup ka bansa diri. Maia nya menya, kitai Iban diau enggau aman lalu nadai bemunsoh enggau bansa bukai, laban tuboh endang enda maioh lalu menoa pan agi puang serta lantang endor ngidup ka diri.

Nyadi sakali, leboh Bada enggau anembiak iya pulai ngasu, hari balat bendar ujan. Meda ujan ngemalat nya, sida lalu mampat daun kayu dikena ngelindong diri ari tinggang ujan ba rantu jalai. Datai sida dalam lubang batu endor sida diau, dia menyadi sida ke indu tak tekenyit meda sida ke pulai ngelaban ujan nya tadi enda basah. Bada lalu madah ka sida iya belindong baroh daun kayu, nya kabuah sida iya enda basah laban ujan.

Bechuan ka nya tadi, kitai Iban lalu nemu mampat daun dikena belindong ka ujan tau ka panas ke lalu dikumbai sida dunju. Udah ngasai ka penyamai ngendoh ka ujan enggau panas baroh dunju, nya baru sida nemu ngaga langkau ke tau alai diau, beatap ka daun kering. Barengkah ari nya, kitai Iban lalu nemu begiga enggau mindah jauh agi ari lubang batu ke alai kitai diau lalu ngujong ka kitai lalu badu agi diau dalam lubang batu.

Udah sida ngasai ka penyamai diau ba langkau nyembuah-nyembuah, runding sida pan mansang ari ke udah. Sida iya pan nyau nemu begaga ka dampa ke endor sida tau diau begulai maioh enggau pangan diri, lebih agi sida ke enggai jauh ari diri Sabilik bakunsi makai, bakunsi jalai ngidup ka diri.

Laban dampa nya mit, lalu tuboh pan nyau mansang maioh, sida ke diau dia pan berasai sekut. Ari nya tadi sida lalu nemu ngaga penaik enggau buka dampa nya besai agi, ke dikumbai sida iya rumah.

Leboh sida baru berumah, udah sida tembu ngentak ka tiang rumah, pagi hari siti leboh sida deka nampong pengawa sida, dia sida meda semua tiang ke udah didirika ka sida dulu ari nya rebah magang. Meda utai bakanya, sida alit bendar ati, nya alai sida lalu ngentak ka tiang nya baru. Pagi siti, leboh sida napat ka pengawa sida dia baru, peda sida tak udah rebah magang ga tiang rumah nya tadi. Tiga hari sida beturut ngentak ka tiang nya, tang tiang sida rebah berari-ari.

Ari siti sida lalu ngentak ka tiang nya dalam agi. Pagi siti leboh sida ngabas tiang sida dia, peda sida tak tengelam magang tiang sida nya tadi. Semina mimit aja agi dipeda bekachuit pansut ari tanah. Leboh sida Bada agi berunding ka utai ti nyelai bakanya, alai anak temuai siko bisi datai ari kampong lalu bejalai nuju sida dia. Iya lalu nanya ka pengawa sida ke begempuru dia. Bada lala madah ka diri deka berumah, tang lalu enda nyadi.

“Enti enda rebah, tengelam ga tiang dientak ka kami,” ko saut Bada.

“Kati alai bakanya, iya kati ka adat dikena kita berumah?” ko tanya anak temuai.

Bada lalu madah ka diri nadai adat dikena barumah, laban endang enda kala ngerja pengawa nya ngelamatu.

“Patut pengawa kita enda nyadi, laban kita nadai atur, nadai adat dikena ngerja utai,” ko anak temuai.

Ninga jako temuai munyi nya, Bada lalu minta ajar anak temuai adat kena barumah, awak ka tau ka chuan sida kedudi hari ila. Anak temuai nya pan lalu bejako madah ka tanah nya bisi orang empu. Enti mensia bisi pengawa ba tanah nya, sida enda tau enda meri tasih ngagai petara ke empu tanah, iya nya Raja Semarugah, mentua Raja Sempulang Gana. Bada lalu nanya ka jalai meri tasih tanah nya, laban Raja Semarugah enda nyengala, enda nyerupa dipeda enggau mata. Ninga tanya Bada munyi nya, anak temuai nya tadi lalu ngajat Bada munyi tu:

Kejang kita deka berumah, tiap-tiap iko tuai bilik enda tau enda dulu ngerembang.
Tuai ke diator dulu ngentak enda tau enda ngiga tambak burong nendak kanan lima iti enggau tambak nendak kiba tiga iti. Iya ke lima iti nya untong orang ke lelaki lalu iya ke tiga iti nya untong sida ke indu. Paung burong tu enda tau enda ditanjong ngagai tanah ke deka endor ngerembang, lalu engkah ka ba senentang bilik orang ke dulu ngentak.
Kejang deka ngentak, indu enda tau enda dulu ngaga perengka piring.
Kejang deka ngelubang ka tiang pemun, babi tauka manok enda tau enda dibunoh. Dara iya dikena ngenselan tiang enggau lubang nya.
Batu kuai enggau repik besi enda tau enda dibai ka dalam lubang tiang pemun.
Udah tiang dientak, pating mumban ujak ka ba pun tiang nya.
Udah anak temuai ngara ka adat, nya baru iya madah ka piring enggau darah babi tauka manok nya jadi ka tasih tanah diberi ngagai Raja Semarugah ngena sampi.

Nyadi repik besi, batu kuai enggau pating mumban nya laban sida nya enda rarat taban ka ai baah, ngayu ka penegut enggau pengukoh rumah nya.

Enti ngentak ka tiang, enda tau enda dulu berengkah ba endor ke alai ngengkah tambak burong nya tadi. Nyadi tambak burong nya tadi disimpan dalam buloh lalu diengkah ka dalam dunju mit, udah nya dibagi tiap-tiap pintu orang ke ngentak dia.

Pia mega orang ke dulu ngentak nya nitih ka pun ramu. Udah abis orang ke pun ramu ngentak, nya baru orang ke ari ujong ramu sapiak tau ngentak ka tiang sida.

Udah abis jako anak temuai nya ngajar sida Bada adat dikena barumah, iya madah ka diri deka pulai. Iya lalu madah ka nama diri Puntang Raga, ke datai ngajar sida ari asoh Raja Semarugah. Udah nya iya lalu lesap.


Source: Benedict Sandin (Gawai Pangkong Tiang)
Gregory Nyanggau Mawar

KAYAU BARU


Aram kitai ngayau baru!

Anang bala kitai malu ke peturun diri empu, kita patut temegah ke diri ti peturun bujang berani. Anang mega bala kita saru penemu, laban kayau ke disebut aku ukai bebunuh baka kitai iban kelia menya.

Kitai mesti mulai ke pengingat lama ngenang aki kitai kelia ke bebendar munuh munsuh maia ke ngayau. Saritu, kitai ke rebak baru anang alah laban bansa bukai, laban kelia kitai udah menang, diatu kitai mesti ka menang mega. Kitai mesti bebendar ngayau penemu, ngayau pemandai, ngayau kerja ngayau pengaya, ngambi ke kitai bansa ulih nerus ke gelar bujang berani. Ukai berani babi, tang berani ngiga penemu, berani ngereja pengawa, berani nguji utai ke baru (beperang anang takut mati, bedagang anang takut rugi.) pia mega berani ngereja utai ti tau mai pemansang serta penyenang ke kitai bansa.

Enti Islam agik bedau ngena istilah “Jihad” sampai ke saritu. Nama kebuah kitai iban enda ngena istilah “Kayau” kitai?

Suba kitai bansa ngayau ngena ilang ngena duku, saritu kitai ngayau ngena pemandai ngena penemu!!

Jerita asal iban nemu berkelingai


Tarubah Bansa Iban Nemu Bekalingai (Bepantang – Tattoo)

MENYA bisi kitai Iban siko ke benama Gendup. Kenyau ari agi biak iya endang penyumpit bendar. Iya suah bendar bemalam dalam kampong, ba lubang batu, di puchok kayu enggau sabelah endor bukai ke manah endor iya nat ka diri dalam babas leboh iya kelalu jaoh udah tapejoh nyumpit. Iya mega endang orang ke berani ngelaban malam, enda takut ka hari jai tau ka ular-embayar, jelu-antu ke tau nganu kitai dalam babas.

Nyadi sakali iya kelalu jaoh tapejoh nyumpit, nyau enda nemu pengelama diri ke udah bejalai. Kepuas bejalai dalam babas dia iya tak rembus ba pendai orang, lalu tepeda ka indu siko mandi. Apin Gendup sempat ngangau alai indu nya lalu nyapa.

“Lalu Gendup, lalu enggau aku mandi dulu,” ko indu nya.

“Nama kebuah enda lalu,” pia ko Gendup, ngengkah ka ma iya lalu sama mandi enggau indu nya. lya alit ati meda indu nya tak nemu nama iya. Udah tembu mandi indu nya lalu mai Gendup niki ka rumah.

“Niki meh Gendup nyereta aku, sida ke lelaki nadai mindah, bisi di rumah magang,” ko indu nya leboh ka mai iya niki.

“Manah endar enti sida bisi di rumah magang,” ko Gendup.

Nyau semak kaki tangga, dinga Gendup tak bakasetik-bakasetok munyi utai dalam rumah orang nya. Iya enda nemu belaba ka pengawa orang ke bengat bakasetik ngemalat nya.

“Nama pengawa orang di rumah dia?” Ko iya nanya indu ke disempulang iya ari pendai.

“Eh, orang ngaga kalingai, orang bepantang,” ko saut indu
nya.

Seduai pen lalu niki ka rumah. Nama agi meda temuai niki, orang lalu bakaraoh ngasoh dudok. Tang iya madah ka diri lalu enggau indu nya ka setak ka dulu. Datai ba tengah Rumah, indu nya lalu tama ka bilik. Gendup lalu ngait ka ma enggau duku iya ba tandok rusa ke ba tiang. Apai tuai orang ba ruai dia lalu nudok ka iya. Gendup pen lalu dudok nunga apai tuai orang nya. Peda iya nyau genarau tuboh apai-tuai orang nya penoh laban kalingai.

Udah badu makai lemai nya sampal bendar orang sarumah, enggau indu enggau anembiak, begulu ka Gendup. Udah nanya ka menoa, orang lalu nanya ka pejalai, laban iya bengat nadai kala udah rembus udah ngebus ba menoa nya. Gendup madah ka diri pejalai lantang. Ninga iya pejalai lantang, sida lalu bungah. Dia sida ke bujang madah ka diri deka ngaga kalingai ka Gendup, dikena ngingat ka iya ke baru rembus. Tang Gendup apin madah ka diri deka, nyangka tak pedis dipantang, ninga munyi orang ti bepantang nyau bakasetok leboh iya baru datai tadi. Malam nya sida ketuai lalu madah ka Gendup bagi kalingai ke diengkah ba tuboh, baka ba rekong, bau, lengan, pah, belakang enggau endor bukai. Orang mega lalu madah ka pasal tegulun ngagai iya “Tegulun enda tau digaga ngapa enti kitai nadai dengah,” pia ko orang madah ngagai iya.

Nyau rindu ninga sida berandau ka pasal kalingai, hari siti baru iya madah ka diri deka dipantang sida. Nya alai sida ke bujang lalu berengkah ngaga kalingai ka Gendup. Tiga hari berunggu sida mantang baru tembu. Nama agi, nadai utai ngemanah nya kalingai ba sebelah tuboh Gendup, orang ga endang landik, bengat tak penatai kalingai. Bentara ka hari udah nya, kalingai iya pan udah ga gerai magang, dia iya madah ka diri bisi ati deka pulai ka menoa, tang iya enda nemu jalai pulai. Apin Gendup pulai, apai-tuai orang nya lalu madah ka nama diri ngagai iya.

“Nama aku Selang Pantang,” ko iya. “Bala kami tu Antu Pantang magang. Nya alai laban nuan, Gendup, terubah mensia datai ba rumah kami nuan mega dulu digaga ka kami kalingai. Lalu nadai orang bukai nemu ngaga pantang enti enda ari ajar nuan enggau peturun nuan jemah ila,” Pia ko jako Antu nya bejako enggau iya. Udah nya iya lalu madah ka jalai pulai ngagai Gendup.

Datai di rumah orang bela ngenong magang medah utai tak begenarau chelum sabelah tuboh Gendup. Iya lalu becherita ka diri ke diau ba rumah sida Antu Selang Pantang, kenyau ari iya ke rembus ba pendai lalu betemu enggau indu mandi. Ari ajar Gendup nya meh pun Iban nemu begaga ka kalingai ba tuboh.

Original Source : Nendak
Researched and compiled by: Gregory N. Mawar