Laban ia Iban

Pagi tok maia ke macha borneo post, aku bisi terbaca ke berita ti chukup narit ati aku, berita pasal siku anak iban ti cukup terbilang nama. Nadai enda dikelala orang ba rantau malaysia tok, enti enda ngelala, ngaga diri nya, tauka tau disebut nadai berpenemu laban ke enda nemu pasal sejarah menua kitai empu, Malaysia.

Anak iban ti desebut ka aku nya tadi nama ia Kanang anak Langkau. Enti kitak bala kaban kala berati ke pengawa tok, dia meh kitai tau ninga nama Kanang tok disebut maia semak semak bulan merdeka baka ke diatu. Enti maia ari ari ke bukai, jarang kitai ninga orang bertusi ke pasal ia. Nadai hal, nya enda ngawa. Tang meh jerita ti balat narit ati aku ba berita Borneo Post saritu nya bersangkut paut ngau ayak Kanang kitai tok tadi madah ke diri enda entu dikingat ke orang jasa ia. Ia nadai nerima utai ti patut diterima ia pemulai ari ia ti ngadai ke nyawa kena nan ke menua kitai tok maia perang ngelaban komunis suba.

Kanang anak Langkau tok meh salah siku orang ti kala nerima pingat ti pemadu besai dalam soldadu, ianya pingat SP (Seri Pahlawan Gagah Perkasa) ari Yang dipertuan Agong Sultan Ahmad Shah, 2 june 1981. Enti dibanding ke ngau pingat-pingat lain ke bisi ba Malaysia tok, SP tok tinggi agik "TUN".

"We (me and my friends) were not hungry of Datukships" - Kanang madah ke diri ia enda kala lapar tauka keran ka ngulih ke pangkat Datuk tauka nama-nama pangkat pemesai ari perintah. Tang ia ngarap ke perintah tau mampas, meri utai ke manah gik, utai ti patut diulih ia baka tanah kena bertupi, duit pencen ti tinggi agik, kena idup ke meruan agik ari ke diatu.

Enti ko aku, Kanang sigi enda patut diberi pangkat Datuk. Nama kebuah aku madah bakanya? Laban mayuh amai orang ti nadai jasa, nadai berpenemu pan tau bulih pangkat Datuk magang. Belagu tau bulih pangkat Datuk, berlakon tau bulih pangkat Datuk, baru angkat mimit-mimit nama tegal pengawa ti enda tentu nipak ke pangkat nya pan tau bulih pangkat Datuk. Nya alai aku madah ke Kanang enda patut bulih pangkat Datuk. SP tinggi agik ari TUN, mayuh kitai Malaysia ke bisi pangkat Tun, SP 12 iku aja, Tun Kanang baru ia! Nama kebuah ayak Kanang tau enda diberi pangkat ti bakanya? Laban ia Iban!!

Ni Kitai?

Ya ke diatu, lansa berita ti benung "top" ba semua stesen tv ngau radio ngait ke pekara UMNO ngau PAS ti bisi dicadang ke dibubar ngau digabung nyadi parti baru.

Alasan ia: Demi orang melayu dan agama islam.

Ni penuduk kitai iban dalam malaysia? Kitai iban bangsa ti pemadu mayuh ba Sarawak tang kitai nadai bisi parti ti tau nyangkung kitai dalam pemansang dunya. Parti PBDS di dikenakut ke bangsa lain ke bisi suba pan nyau nadai agi tegal menteri kitai ke sama bela besai rekung tegal ke ka nyaga periuk asi diri empu. Kitai iban belaya sama diri, parti pecah, orang lain ketawa. PBDS pecah ukai tegal masing, pan ukai tegal daniel. Tang meh tegal bangsa bukai ke ngai meda penyerakup bala kitai iban dalam parti.

Anang enda ingat, PBDS kala alah satu undi aja laban BN sarawak maia ke PBDS agik nyadi pembangkang suba, nya pan tegal Geramung Juna ti lari ari PBDS masuk BN.

Tang ke diatu, PBDs tinggal kenang aja. Tegal bala pengari bangsa kitai ke berebut ka ngisi periuk asi diri empu, bangsa kitai nadai parti ke bendar agik, parti ti bertunjang ka bangsa kitai dayak, parti ti ngari ke kitai!

Diatu, dini kitai?

Lain munyi tabuh, lain rentak ajat.

15July2008 tau disebut pengepun "The freedom of speech/ media" (Kebebasan media dan bejako). Taja pan enda sebaka ngau menua bukai ti ngemeran ke kebebasan hak asasi manusia, tang sari nya bisi penyelai ari ari ke bukai kenyau ari mula Malaysia merdeka kelia. Utai ke nyelai nya tadi nyadi ba TV9 ngau TV3, dia kerajaan ngemendar ke kedua kedua stesen tv nya tadi nganjur ngau neyang ka debat (belaban jako) antara Menteri penerangan Malaysia Datuk Ahmad Shaberi Cheek ngau penasihat Parti Keadilan Rakyat Datuk Seri Anwar Ibrahim.

Takuk debat nya "Hari ini membentuk kerajaan, esok turun harga minyak" (Sari tok nyadi perintah, pagila nurun rega minyak).

Ngagai bala kitai ke bisi meda debat tok, nama runding bala kitak?

Tok runding aku, lain tabuh anwar, lain ajat shaberi.

"Opening Statement" Anwar ngelaban Shabery, Shabery enti kitai berati ke amai-amai, ia baka ke enda tentu dalam penemu dalam hal ti diperdebat ke seduai. Anwar nanya ke pasal kini penunga duit petronas ngau nama kebuah penyata keuntungan petronas enda tau ditayang ke ngagai rakyat, tapi utai ke disaut shaberi lain ari ke ditanya, ia nyau nyerang anwar cara peribadi, ngungkai isu anwar ti ngepun ke tunjuk perasaan maia ia ke agik belajar ba universiti malaya taun 1974 nyin suba.

Taja pan kedua dua seduai ti belaban tok tadi sama sama landik berputar ke jaku. Tang meh ba runding aku, Anwar ka lebih mimit ari shabery, ukai ketegal cara ia ti bejaku ngau mua mua ia skali, tang meh laban "points" ia cukup kuat ngejung ke shabery tusah amai ka nyaut. Nyau berbuih tudah mulut shaberi, tang meh utai ke disebut nya mayuh gk kuah ari isi.

Bakanya mega bala wakil takyat kitai. Mimit aja ke bala sida ti kerja ngau ati ti lurus ka ngemansang ke bangsa diri. Mayuh agik ke semina ka nyaga periuk asi diri empu. Bertuah rakyat Sabah, enti kitak bala kaban bisi meda debat ba parlimen, MP ari sabah nang bebendar bertanyak bersaut tegal ke ka ngemansang ke menua diri. MP ari Sarawak nadai didinga engkeretik? MP kitai iban? Nya jauh agik...

Ari mija pengarang

Bertemu kitai,

Aku ngau penuh gaga ati ngelalu ke penatai bala kita lalu meri terima kasih laban ka sanggup singgah enda lama ba laman blog aku tok. Anang singgah aja menyadi, lalu duduk meh, ai kopi (topic/post) udah gak dinah ke aku, anang malu neh bala kita ngirup (mantai ke penemu diri/comment).

Keterubah ia, ngagai bala kitai ke agik bedau ngelala aku. Nama aku Allen Nguling ak Charlie, anak iban ti berasal ari simanggang. Apai aku iban, bisi darah cina, indai aku iban, tang bisi mega darah cina, nya alai enti bala kita meda aku (selalu ia orang meda aku) enda pecaya ke aku tu iban, sampai aku mantai ke I.C diri empu. Iban aku tu, I.C sigi udah madah bakanya.

Aku chukup bertuah laban ada ke dunya nyadi bansa Iban ti chukup kaya enggau penemu baik nya ari segi main asal, bekelingai, adat, mayuh agi. Kebuah aku bejalai ke pengawa nulis blog tu nadai lebih agi nyadi ke "platform" kitai ke rebak baru bekunsi enggau sida ke bisi agi penemu dalam semua utai ti bekait enggau kitai bansa.

Aku ukai orang ti balat berpenemu dalam pengawa ti bakatu, tang meh tegal ke deka nitih pemansang dunya, tambah agik pengeran ati ti deka berkunsi ke buah runding diri ngau bala mayuh, aku ngambi peluang tok, muka blog diri empu, lalu ngarang dalam jako iban.

Penudi sekali, aku minta ampun enti aku bisi tersalah jaku terlajur tulis.

Nya aja, mupuk aku.